Supplements on a Budget مكملات غذائية


تبي تشتري مكملات غذائية، بس مو عارف شنو تحتاج بالضبط، وما ودك تصرف فلوسك على شي الا اذا كنت فعلاً محتاجة؟ 
أول شي، لازم نستوعب ونفهم ان المكملات الغذائية هي "مكمل" للأصل، والأصل هو الغذاء الطبيعي، يعني تحتاجها فقط اذا كان غذائك ناقص

انزين شنو المكملات الغذائية الي ممكن تحتاجها كرياضي؟

نبلش أول شي بالكرياتين


من افضل المكملات الغذائية في زيادة القوة والحجم والاستشفاء العضلي، دراسات ما تخلص اثبتت فعالية الكرياتين كمكل غذائي للرياضيين. ولهذا السبب اقولكم، اذا ما تبي تشتري اكثر من مكمل غذائي واحد، احرص انه يكون الكرياتين

مكملات البروتين (بروتين مصل الحليب)

البروتين بشكل عام هو المسؤول عن بناء العضلات، ما أبي أقول انك ما تقدر تستغني عنه، لانك تقدر تحصلة من الطعام الطبيعي، بس مكملات بروتين مصل الحليب (واي بروتين) سريعة الامتصاص والهضم، تقدر تستفيد من هذه الخاصية بانك تاخذه مباشرة بعد التمرين، وبعدها بشوي تقدر تاكل، يعني تستفيد من وجبتين خلال وقت قصير، هالشي مريح جداً خاصة اذا كنت مشغول و روتينك اليومي ما يسمحلك انك تغطي احتياجك الكامل من البروتين عن طريق الطعام الطبيعي

مكملات الفيتامينات والمعادن

أغلب الدراسات عليهم تقول ان الرياضي ما يحتاج يستهلك هذه المكملات اذا كان يحصل على كفايتة منهم عن طريق الأكل، وهذا شي طبيعي، لكن في حال كان الرياضي يستهلك طاقة أقل من احتياجة (لخسارة الوزن والدهون)، تصبح مكملات الفيتامينات والمعادن ضرورية لسد هذا النقص، يعني اذا كان غذائك قليل، او كنت شخص ما تاكل كفايتك من الخضروات والفواكه، فأنصحك انك تعوض بالممكملات

مكملات الاوميغا-٣

من أهم الأحماض الدهنية والأساسية للجسم، أساسية يعني الجسم ما عنده القدرة على تصنيعها، أغلب الناس ما تستهلك حاجتهم من هذا الحمض الدهني، ولهذا السبب، استخدام مكملات الاوميغا-٣ ضروري واساسي اذا ما كنت تاكل كفايتك من سمك السلمون والسردين وبذون الشيا والكتان والجوز

مكملات البي سي أي أي (BCAA)

تقريباً ثلث عضلاتك الهيكلية تتكون من البي سي اي اي، ثلاث احماض امينية اساسية للجسم، نحصلها من جميع مصادر البروتين في الأكل، لكن استخدامها قبل واثناء التمرين يساعدنا في تقليل الارهاق الناتج من التمرين ويساعدنا على الاستشفاء العضلي بعد التمرين. أنصح باستعمالها خاصة اذا كنت تستهلك اقل من احتياجك من البروتين والطاقة

الخلاصة: ما تحتاج انك تصرف فلوسك على مكملات غذائية الا اذا كنت فعلاً محتاجها، اعرف احتياجك، وشوف شنو ناقصك قبل لا تشتري أي منتج