الكارديو في رمضان

ما أدري عن باقي دول الخليج، لكن عندنا في الكويت أعداد كبيرة يمارسون تمارين الكارديو (الهوائية) قبل الإفطار، سواء في الممشى أو النادي أو مع القروبات في المجمعات التجارية، فقلنا نرد على بعض استفساراتكم المتعلقة بتمارين الكارديو في شهر رمضان.
-
هل في مشكلة إنك تتمرن تمارين هوائية قبل الفطور؟
-
إذا كانت صحتك سليمة وشارب ماي وماكل عدل اليوم الي قبل، مافي أي مشكلة إنك تمارس التمارين الهوائية قبل الفطور، لكن اذا حاس بجفاف وتعب، لا تتمرن قبل الفطور، وخلها بعد الفطور احسن لك.
-
وإذا كان الشخص يعاني من أمراض مزمنة؟
-
إستشير طبيبك قبل البدء في أي برنامج رياضي، وغالباً بيقولك خلها بعد الفطور أفضل لك.
-
زين، ليش قبل الفطور؟
-
عادي تقدر تتمرن كارديو بعد الفطور، لكن وقت الأكل قليل في رمضان (خاصة في الصيف) فأحسن لك تخلي الكارديو قبل الفطور عشان يصير عندك وقت أكثر بعد الفطور، خاصة اذا كنت تبي تتمرن تمارين مقاومة بعد الفطور.
-
متى بالضبط قبل الفطور؟
-
في الساعة أو الساعتين الأخيرة قبل موعد الافطار.
-
شكثر المدة؟
-
حسب نظامك التدريبي وهدفك، لكن لا تتعدى ٦٠ دقيقة.
-
اتمرن كارديو شديد ولا خفيف؟
-
خفيف، مثل المشي، الهرولة الخفيفة، الدراجة الهوائية بسرعة معتدلة، السباحة عالراحة، او تمرن مع قروبات وكلاسات تحت إشراف مختصين... أهم شي انك ما تعرق وتجهد نفسك وايد.
-
ونعيد نذكركم، إذا في أحد يعاني من أمراض مزمنة (سكري، ارتفاع ضغط، امراض قلب... الخ) إستشير طبيبك قبل أي شي.