Calculate It Right إحسبها صح

السناك في الصورة جداً صحي وبسيط، كل الي عليك تسويه هو إنك تاخذ شريحة توست أسمر وتحط فيها زبدة فول سوداني وتفاح وفوقهم عسل وتمتع بالفوائد الصحية الي ما تخلص... لكن موضوعنا اليوم هو عبارة عن توضيح لموضوعنا أمس، واليوم بنحاول نوضح لكم الفرق بين الأكل المحسوب والأكل العشوائي باستخدام هذا السناك كمثال. -
السيناريو الأول (الوصفة محسوبة)
-
شريحة توست أسمر (٨٠ كالوري)
ملعقة طعام زبدة فول سوداني (٩٠ كالوري)
ملعقة شاي عسل طبيعي (٢٠ كالوري)
١٠٠ جرام تفاح أحمر (٥٠ كالوري)
-
يعني المجموع (٢٤٠ كالوري)
-
السيناريو الثاني (الوصفة العشوائية بدون قياس)
-
شريحة التوست بتظل نفسها (٨٠ كالوري) لكن حطيت فوقها زبدة فول سوداني بدون قياس وطلعت الكمية اكثر شوي من ملعقة طعام، خل نفترض بانها كانت ملعقة ونصف (يعني صارت ١٣٥ كالوري)، وقمت يبت تفاحة حمرة حجم وسط وقصصتها وصفيتها على التوست (٩٥ كالوري)، وآخر شي صبيت فوقهم عسل وكانت الكمية ملعقة طعام بدال ملعقة شاي (٦٥ كالوري)، يعني صار المجموع (٣٧٥ كالوري)
-
هني يصير الخطأ في اتباع خطة الحمية، تكون شاد حيلك وملتزم في الحمية تمام، لكن الزيادات هذي الي ماتحس فيها (١٣٥ كالوري) زيادة في هذا السناك فقط، وفوقهم زيادة بنفس الصورة في كل وجبة وسناك، توصل آخر اليوم تلاقي نفسك ماكل ٥٠٠-٧٠٠ كالوري زيادة على الحسبة، يعني بدال ما تاكل ٢٠٠٠ كالوري مثلا، تلاقي نفسك قاعد تاكل ٢٥٠٠-٢٧٠٠ كالوري.
-
لهذا السبب نقولكم، حرصوا على اتباع ارشادات الحمية صح، قيس أكلك ولا تستهين بالزيادات البسيطة لأنها ممكن تخرب عليك شغلك، وسلامتكم.