الرجيم وثبات الوزن

شديت حيلك وسويت رجيم وبلشت رياضة ووزنك قاعد ينزل وكل شي ماشي صح، فجأة وزنك علق وما صار ينزل!!!
-
لا تحاتي، هذا شي طبيعي ويصير مع الكل، الوزن أول شي ينزل أسرع (لانك راح تفقد ماء في الفترة الاولى) بعدين يصير أبطىء لغاية ما يوقف... هني غالباً صار حرقك معادل لأكلك، ولهذا السبب وزنك مو قاعد ينزل (طبعاً كلش مو قاعد نتكلم عن الاشخاص الي قاعد يبنون عضلات، لان هذا وضع مختلف، قاعد نتكلم عن الناس العادية الي تبي تضعف)
-
لانك خسرت من كتلة جسمك (خاصة الكتلة العضلية اذا ما كنت تتمرن)، هني صار جسمك يحرق أقل من قبل، فسالفة انك تمشي على نفس النظام ماعاد تفيد، ولازم يصير في تغيير.
-
التغيير بيكون إما عن طريق تقليل السعرات الحرارية أو زيادة النشاط الحركي أو الإثنين.
-
لكن ما ينصح بإنك تنزل بالسعرات وايد، لأن هالشي بيصير عكسي عليك (تكلمنا عن هالموضوع قبل)
-
كل هذا الي فوق يعتبر وضع طبيعي، الغير طبيعي هو السيناريو الآتي:
-
شخص بلش رجيم قاسي (قليل حيل في السعرات الحرارية) وبنفس الوقت صار يتمرن ساعة ولا ساعتين في اليوم، وفي البداية الوضع ماشي حلاوة، الوزن قاعد ينزل وحدك مستانس، لغاية ما وصلت مرحلة صار فيها حرقك يعادل اكلك، ووزنك علق خلاص صار ما ينزل، شراح تسوي في هذه الحالة؟ ما تقدر تقلل أكلك أكثر، ولا تقدر تزيد نشاطك الحركي أكثر.
-
لهذا السبب دائماً نقولكم تدرجوا في كل شي، لا تتبع نظام قاسي، وحاول كثر ما تقدر انك تزيد من لياقتك ونشاطك أولاً، بعدين قلل أكلك إذا محتاج هالشي.
-
مشتركينا بشكل عام، نمشي معاهم بالتدريج في الرياضة، ونحاول نعطيهم اكبر كمية اكل ممكنه (مع مراعاة بان يكون الاكل مصمم لخسارة الوزن اذا كان هذا هو الهدف)
-
الحين نبي مشاركتكم وتعليقكم على السيناريو الي فوق، شنو لازم يسوي هالشخص بعد ما اتبع نظام قاسي وعلق وزنه لفترة طويلة؟ شاركونا تحت 👇🏻👇🏻👇🏻