إحتياجك من السعرات لخسارة الوزن

موضوعنا اليوم للتوضيح عن أهمية تحديد مستوى الطاقة المناسب لخسارة الوزن، والسبب هو كثرة الاسئلة والاستفسارات بهذا الموضوع. -
أول شي بنشرح الموضوع ببساطة، عشان تخسر وزنك لازم تاكل أقل من السعرات الي تحرقها، يعني أول شي لازم تعرف شلون تقدر حرق جسمك اليومي، وهذا يعتمد على عدة عوامل (طولك ووزنك وعمرك ونشاطك الحركي) وعلى هذا الأساس تقدر تحدد كمية السعرات الي بتساعد على خسارة وزنك.
-
ذكرنا هذه النقطة مو عشان نقولكم شلون تحسبون، لاء، عشان نبين لكم بأن كل شخص احتياجة مختلف عن الآخر، يعني ما ينفع تدش الانترنت وتاخذ أي رجيم موجود وخلاص، لازم يكون مناسب لك (لان من الاسئلة الي توصلنا، انا اكل ١٠٠٠ كالوري، رجيمي صح ولا غلط؟) -
الجواب غالباً بيكون لاء، رجيمك مو زين، لان ١٠٠٠ كالوري جداً قليلة... متوسط احتياج النساء من السعرات هو ٢٠٠٠ كالوري في اليوم، والرجال هو ٢٥٠٠ كالوري في اليوم، وعشان تضعف بالمعدل الطبيعي (نصف كيلو في الاسبوع) تحتاج فقط انك تاكل ٥٠٠-٦٠٠ كالوري اقل (يعني ١٥٠٠ كمتوسط للنساء، و ٢٠٠٠ كمتوسط للرجال) -
زين يعني هل معنى هذا الكلام بانك اذا اكلت ٥٠٠ كالوري اقل، راح تنزل نصف كيلو كل اسبوع؟
-
لاء مو شرط، لان هالشي ايضاً يعتمد على عدة عوامل، مثل وزنك وطولك وعمرك ونشاطك الحركي وصحة الأيض والنفسية وعدة عوامل أخرى، لكن احنا فقط نبي نوضح لكم، بان رجيمات بو ٨٠٠ و ١٠٠٠ كالوري خطأ.
-
مو محتاج تقلل استهلاكك للطعام هالكثر، بالعكس، الجسم محتاج يتغذى، وضروري تغذي الجسم صح وانت قاعد تخسر وزنك، عشان ما تتدهور صحتك ويكون نزولك صحي.
-
عشان يكون نزولك صحي، يفضل بانك تقلل اكلك بالمعقول، وتزيد من معدل حرقك عن طريق استهلاك بروتين اكثر والتقليل من السكريات والحلويات وشرب الكفاية من الماء وممارسة الرياضة والنوم والراحة الكافية.
-
كلش مو محتاج تذبح نفسك من الجوع وتحرم نفسك من كل شي وتعيش في تعب وارهاق وقلة الطاقة والنشاط والحيوية... احسب احتياجك صح وصمم غذائك ونظم حياتك وبتشوف الفرق، واذا ما تعرف، راجع معانا او مع اي اخصائي تغذية وخل يضبط لك النظام المناسب، وسلامتكم. -
#لا_للتجويع #احسبها_صح #اكل_طيور #خلك_صملة