قياس الطعام وثبات الوزن

ماشي على نظام غذائي مضبوط ومافي أي بوق إطلاقا وأكلك كله نظيف... بعد شهر تاخذ مقاساتك ووزنك وتنصدم بأن وزنك ومقاساتك ما تغيرت إطلاقاً، شلون؟ ليش مافي أي تغيير؟!!
-
ثبات الوزن له عدة أسباب، لكن اليوم راح نتكلم عن أهمها وهو عدم الإلتزام في الكميات الموصوفة.
-
قياس الكميات باستخدام الميزان واكواب القياس ضروري جداً، غير هالكلام بيكون شغلك عشوائي، وندري بأن في ناس تضعف وتحسن من اجسامها عن طريق اتباع حمية صحية بدون قياس، لكن أيضاً في ناس كثيرة تاكل نفس الاكل ووزنها ثابت وما ينزل، والسبب هو انهم قاعد ياكلون كميات من الطعام تعادل حرقهم اليومي، يعني كأنك قاعد تحافظ على وزنك (أو ممكن وزنك يزيد اذا اكلت اكثر حاجتك) -
الزيادات العشوائية البسيطة في كل وجبة او سناك (ملعقة عسل زيادة، ملعقة سكر زيادة، ملعقة صلصة زيادة، شوية مكسرات، شوية حب شمسي... الخ) كلها راح تتراكم في نهاية اليوم بدون لا تحس.
-
ميزة قياس الطعام هي انك تكون عارف بالضبط شكثر قاعد تاكل، فاذا كنت ماشي على قياس ثابت، ومازال وزنك ثابت بالرغم من انك ماشي على حسبة صحيحة، هني تعرف بان المشكلة تكون في كمية حرقك اليومي وليس في كمية الطعام المستهلك، يعني تبلش تشوف حزتها وتشوف شنو ممكن يكون السبب، هل هو قلة نشاطك الحركي اثناء اليوم؟ عدم ممارسة الرياضة؟ قلة شرب الماء والجفاف؟ خلل في الهرمونات؟ قلة نوم؟ الخ.