الضغوطات ووزن الجسم

مشاكل الحياة وضغوطات العمل وقلة النوم كلها ممكن تسبب لك زيادة في الوزن (أو تعرقل نزول وزنك أثناء اتباع الحمية)، ليش؟ لأن كل هذه الضغوطات تزيد من الشعور بالجوع.
-
زين، بس أعرف وايد ناس يفقدون شهيتهم لما تكون عندهم ضغوطات، شلون؟ صحيح، في البداية، البعض ممكن يفقد شهيتة، لكن اذا استمرت الضغوطات النفسية راح تزيد الشهية والشعور بالجوع على المدى الطويل.
-
عند زيادة الضغوطات النفسية، تزيد مستويات هرمون الكورتيزول، وهالشي اذا استمر، راح تصير تاكل وايد أكثر من إحتياجك.
-
زيادة مستويات هرمون الكورتيزول تساعد على إفراز كميات أكبر من هرمون الانسلين، والذي بدورة راح يخفض من سكر الدم، وبالتالي تزيد عندك الرغبة في تناول السكريات والدهون.
-
كذلك، الاغذية العالية بالسكر والدهون تعتبر مصدر راحة لاغلب الناس، لان الجسم يفرز مواد كيميائية لها تأثير مريح للمزاج عند تناول الاغذية اللي نحبها (والتي هي السكريات والدهون للاغلبية)
-
يعني وبكل إختصار، الضغوطات النفسية تزيد من افراز هرمون الكورتيزول وبعدها تزيد عندك الشهية للاغذية العالية في السكر والدهون وبعدها ممكن يزيد وزنك وتتدهور صحتك بسبب زيادة الوزن والسمنة.
-
والحل؟
-
الحل هو انك تحاول تقلل من الضغوطات النفسية قدر الامكان، واذا في اشياء ما تقدر تتحكم فيها، تعلم شلون تتعامل معاها بصورة صحية وايجابية، حاول تنام عدل واشغل وقتك في الاشياء المفيدة التي تعدل النفسية مثل الرياضة والقراءة والتأمل والعبادة، لان الافراط في الاكل راح يزيد من الضغوطات النفسية وأيضاً راح يزيد من فرصة الاصابة بالامراض المزمنه مثل امراض القلب وضغط الدم والسكري وغيرة (يعني كلش ماراح ينفعك بشي)، وشكراً.