ليش لازم يكون النظام الغذائي مرن؟


قبل لا نجاوب على هذا السؤال لازم نوضخ نقطة مهمة جداً وهي:
-
النظام الغذائي المرن لا يعني انك تاكل خرابيط طول اليوم (هذا اعتقاد خاطىء)، النظام المرن يجب أن يكون موزون وصحي ويغطي كافة احتياجاتك من الطاقة والمغذيات الكبرى (بروتين، دهون، كربوهيدرات) والمغذيات الصغرى (فيتامينات ومعادن)، يعني وبإختصار النظام الغذائي المرن هو نظام غذائي صحي.
-
الحين نجاوب على السؤال، ليش لازم يكون النظام مرن؟
-
لأن ٩٥٪‏ من الناس اللي يتبعون الانظمة الغذائية (سواء لخسارة الوزن او التنشيف او بناء العضلات او لتحسين الاداء الرياضي) ما يقدرون يصملونها على المدى الطويل، يعني ما يقدرون يستمرون في النظام على طول.
-
المشكلة مو بس انهم ما يقدرون يستمرون، المشكلة انهم يرجعون اسوأ من الأول، يعني يرجعون وزنهم المفقود وزيادة، كم شخص مر عليك ضعف أو نشف وقسم جسمه وبعدها رجع متن أو اختفت تقاسيم معدتة وكرش؟ والمشكلة الاخرى هي صعوبة خسارة الوزن بعد ما رد زاد! يعني مو بس رجع متن، كذلك صار ما يقدر يضعف بسرعة حتى لو اتبع نظام قاسي!
-
زين شلون النظام الغذائي المرن افضل من غيره من الانظمة؟
-
المرونة تزيد من فرصة الاستمرارية (وايد اسهل انك تستمر مع نظام مريح، أما النظام القاسي فصعب انك تعيش عليه) والاستمرارية تضمن لك الحفاظ على نتائجك.
-
النظام المرن يصمم وفقاً لاحتياجك من الطاقة والمغذيات (يختلف احتياج الجسم من شخص الى شخص اخر) ووفقاً لحالتك الصحية (تقل المرونة كلما زادت الامراض المزمنة) ووفقاً لذوقك في الاكل (تاكل الاكلات الصحية اللي تحبها من المجموعات الغذائية المختلفة) واذا غطيت كل هذا ولقيت مجال تضيف سناك أو وجبة تحبها (مثل الكاكاو او الايس كريم...الخ) شالمانع؟ دام جسمك قاعد يتعدل ومرتاح وصحتك في تحسن، يعني شغلك صح.
-
الخلاصة: تتبع نظام قاسي وتضعف وايد خلال شهر وتردهم وفوقهم حبتين خلال اسبوع؟ ولا تتبع نظام صحي ومرن وتنزل نزول صحي وعلى الراحة؟ القرار قرارك، بالنهاية هذا جسمك وانت حر فيه.
-
كتبوا تحت عن تجاربكم مع الانظمه الغذائية المختلفة، شكثر تغيرت اجسامكم؟ محافظين حتى الان على النتائج ولا لاء؟