لا تفلها بعد التنشيف

أسوء شيء ممكن تسويه هو إنك تفتح بالأكل مباشرة بعد الإنتهاء من التنشيف... سواء كان التنشيف لبطولة أو لنفسك... في كل الحالات، الزيادة الكبيرة في كمية الطعام بشكل مفاجىء مو لصالحك إطلاقاً.
.
شنو يعني تنشيف (حق الي مايعرف) .
بإختصار التنشيف مصطلح يطلق على عملية تقليل دهون الجسم (عن طريق الحمية والتمرين) مع المحافظة على أكبر قدر ممكن من كتلتك العضلية. .
زين، ليش ما تفتح بالأكل بعد التنشيف مباشرة؟ .
لأنك عشان توصل لنسبة منخفضة من دهون الجسم، راح تضطر إنك تقلل من كمية طعامك (سعراتك الحرارية) عن طريق تقليل كمية الكربوهيدرات والدهون بشكل تدريجي... بهذه الفترة، جسمك تأقلم وتكيف على كمية السعرات الحرارية المنخفضة... يعني بإختصار، حرقك صار أقل... ولهذا السبب نقولك لا تفلها بالأكل... لأنك راح تزيد الدهون في الجسم بسرعة... والحل؟ .
الحل هو زيادة كمية السعرات الحرارية بحذر وبشكل تدريجي... عشان تعطي مجال لجسمك للتأقلم والتكيف على هذه الزيادة... والنتيجة؟ .
مع الوقت بتلاحظ أن كمية أكلك رجعت للمعدل الطبيعي بدون الزيادة الكبيرة في كمية دهون الجسم... وهذا مو بس زين لك بوقتها... هذا أيضاً مفيد لك لما ترجع تنشف مرة ثانية في المستقبل... بتلاحظ إنك تنشف أسرع وأسهل من قبل... وصلت الفكرة؟ .
نختصرلك الموضوع ونقول:
.
مثل ما نشفت جسمك بالتدريج عن طريق تقليل كمية الكربوهيدرات والدهون في غذائك... إرجع زيدهم بالتدريج بعد الإنتهاء من التنشيف... وسلامتكم يالربع.