شكثر أضعف إذا مشيت ٤٠ دقيقة


شخص يسأل من بعد آخر موضوع عن الرياضة ويقول:
.
"شكثر ممكن أضعف إذا مشيت لمدة ٤٠ دقيقة ٥ مرات في الإسبوع بدون إتباع حمية؟" .
وقلنا لازم نشارككم الإجابة، لأن أكيد في وايد ناس يمشون ٥ أو ٦ مرات في الإسبوع بهدف خسارة الوزن، لكن بدون إتباع نظام غذائي لخسارة الوزن.
.
الجواب المختصر بيكون... ما راح تضعف وايد... والسبب؟ .
دراسات عديدة ما لقت خسارة ملحوظة في الوزن عند البدء في ممارسة الرياضة الخفيفة (مثل المشي لمدة ٣٠-٦٠ دقيقة) بدون إتباع حمية مصممة لخسارة الوزن... ليش؟
.
لأن كمية الطاقة المصروفة من المشي بسرعة معتدلة لمدة ٤٠ دقيقة غير كافية لخسارة الوزن بشكل ملحوظ.
.
نحطها بالأرقام عشان توضح الصورة:
.
شخص غير رياضي مشى لمدة ٤٠ دقيقة ممكن يصرف ٢٥٠ كالوري تقريباً. .
نفس الشخص كان بيحرق حوالي ٦٠ كالوري لو قعد في مكانة وما تحرك لمدة ٤٠ دقيقة.
.
يعني كمية الطاقة المصروفة الإضافية من المشي لمدة ٤٠ دقيقة (لهذا الشخص) هي ٢٥٠ - ٦٠ = ١٩٠ كالوري زيادة في يومة.
.
١٩٠ كالوري في ٥ مرات من المشي = ٩٥٠ كالوري في الإسبوع = ٣٨٠٠ كالوري في الشهر تقريبا .
يعني تقريبا كمية الطاقة المصروفة في الشهر بتساعدك تفقد نصف كيلو فقط.
.
هذا إذا إفترضنا أن هذا الشخص قاعد ياكل نفس السعرات ويحرق نفس الكمية وإذا ألغينا جميع التغييرات التعويضية الي تصير في الجسم (موضوع طويل ويحتاج بوستات بروحة) .
عموماً، الفكرة الي نبي نوصلها هي:
.
لخسارة الوزن بشكل ملحوظ، تحتاج إنك تحرق أكثر من أكلك بكمية تفوق ٥٠٠ كالوري في اليوم.
.
فإذا كنت تبي تمشي ٤-٥ مرات في الإسبوع عشان تضعف، على الأقل ضبط أكلك، وإذا ما تبي تقلل أكلك، على الأقل مارس رياضة صجية عشان يكون الحرق عالي ومؤثر لخسارة الوزن بشكل ملحوظ.
.
وسلامتكم يالربع.