هل لازم أتمرن بالأوزان عشان أضعف؟

هالسؤال يوصلنا يومياً من متابعينا:
-
"يعني لازم أتمرن تمارين مقاومة عشان أضعف؟ ما أقدر أكتفي بنشاط رياضي أحبة مثل المشي أو الكلاسات أو كرة القدم أو الفنون القتالية؟" -
طبعاً هذا السؤال من أشخاص غير رياضيين ويبون يضعفون ومو قاعد نتكلم عن لاعبين الرياضات المختلفة، عشان ما يصير معاكم لبس في الموضوع.
-
الجواب على السؤال:
-
نعم تقدر تضعف بدون ممارسة تمارين المقاومة، وبعد تقدر تضعف بدون ممارسة أي نوع من أنواع الرياضة طول ما انك قاعد تاكل كمية أقل من حرقك اليومي... لكن خل نفصلها أكثر:
-
🔹 شخص يضعف عن طريق إتباع نظام غذائي صحي فقط:
-
أكيد بيستفيد من التغذية السليمة وبيقدر ينزل وزنه لانه قاعد ياكل أقل من حرقة اليومي، لكن مع الوقت نزولة بيصير وايد صعب واحتمالية الترهل بتكون عالية (خصوصا اذا كان يحتاج يفقد وايد وزن) -
🔹 شخص يضعف عن طريق إتباع نظام غذائي صحي + ممارسة الرياضة الهوائية فقط (نفس الناس الي تسأل)
-
أكيد بيكون أفضل من إتباع الحمية فقط، والتمارين الهوائية بتزيد من معدل السعرات المصروفة وبالتالي بتسرع من عملية نزول الوزن... لكن إحتمالية الترهل أيضاً بتكون عالية... فإذا كان هدفك هو خسارة الوزن على الميزان فقط، هذي بتكون أفضل طريقة.
-
🔹 شخص يضعف عن طريق إتباع نظام غذائي صحي + الرياضة الهوائية + رياضة المقاومة:
-
هذا راح يخسر دهون أكثر وشكلة بيكون أفضل ومتناسق أكثر وفرصة حدوث الترهل بتكون وايد أقل... ومو بس هذا، كذلك معدل حرقة اليومي بيزيد مع زيادة الكتلة العضلية، يعني بيقدر يحافظ على وزنه المفقود أكثر من غيرة على المدى الطويل...وهذه هي الطريقة الأفضل. -
طبعاً، في النهاية... خسارة الوزن عن طريق التغذية السليمة بتحسن من صحتك في كل الأحوال... لكن إحنا في درّبني نبيك تخسر وزنك الزايد صح، وهذا يكون عن طريق التغذية السليمة وممارسة الرياضة الهوائية مع رياضة المقاومة، وسلامتكم يالربع.