!نوادي أكثر، توعية أكثر، وسمنة أكثر

جميع الإحصائيات تبين بأن معدلات السمنة في تزايد مستمر (الكويت تحتل المراكز الأولى في السمنة عالماً)... وفي نفس الوقت، مراكز التغذية وشركات تجهيز الوجبات الصحية والمطاعم الصحية والنوادي الصحية والجمعيات الصحية ومحلات المكملات الغذائية في تزايد أيضاً! -
زين، إذا الناس قامت تسوي رجيم أكثر من قبل، والتوعية أكثر من قبل (سوشيال ميديا، محاضرات، انشطة، الخ) والنوادي الصحية كلها زحمة ماشاءالله، شلون معدلات السمنة قاعد تزيد؟ -
السبب الرئيسي يالربع هو "قلة الحركة"... نعم، العموم صار يشترك في نادي ويمارس الرياضة، لكن باقي يومك شقاعد تسوي؟ ولا شي... الحركة والانشطة اليومية (غير الرياضة) وايد أقل من قبل... -
الطفل تلاقيه طول اليوم على الآيباد والبلي ستيشن والتلفزيون أو قاعد يدرس على مكتب! -
والكبير قاعد على مكتبة طول فترة الدوام وبعدها يرجع البيت ينام له ساعتين وبعدين يروح الديوانية ولا الزوارة ولا يروح له عرس أو مناسبة يوجب أو تلاقيه قاعد في البيت يطالع مسلسلات على التلفزيون وغيرة.
-
طبعاً مو الكل عايش حياته بهذه الطريقة، لكن نقدر نقول الأغلب من الناس... والحل؟ -
زيد حركتك خلال اليوم، إحسب خطواتك (طوف العشر الاف خطوة في اليوم)، إذا مشوارك قريب إمشي، خلك حركي ولا تصير ربادي... وصلت؟ -
الخلاصة: تحرك وخلك نشيط خلال يومك، حتى لو كنت تتمرن يوميا في النادي، وشكراً.