ليش روب يوناني بدل الروب العادي؟


لاحظنا عدد من المشتركات يبدلون الروب اليوناني الخالي الدسم مع روب يوناني كامل الدسم، وأيضا العديد لديهم استفسارات عن الروب اليوناني، فقلنا نجاوب في بوست عشان الكل يستفيد.
-
🔹 ليش روب يوناني بدل الروب العادي؟
-
لأن لما المراجع يلغي نصف مصادر البروتين (ماحب السمك، ماحب الدجاج، ماحب اللحم... الخ) وايضا يرفض استخدام مكمل البروتين للتعويض، هني لازم نعوضة من مصادر اخرى مثل الروب اليوناني... الروب العادي ممتاز لكن كمية البروتين فيه أقل.
-
🔹 ليش خالي الدسم مو كامل الدسم؟ -
لأن نسبة البروتين وايد اعلى والسعرات وايد أقل (مثل ما انتوا شايفين في الصورة)
-
🔹 زين مو يقولون كامل الدسم يشبع اكثر؟
-
اكيد يشبع اكثر (كمية دهون وسعرات اعلى) لكن احنا مو قاعد نوصف الروب اليوناني خالي الدسم بروحة! نوصفة مع اضافات مثل الفواكه والشوفان والمكسرات وبذور الشيا والعسل عشان تصير وجبة كاملة.
-
🔹 وين المشكلة اذا الاثنين صحيين؟
-
مافي مشكلة صحية اطلاقاً، لكن انتي قاعد تزيدين كمية السعرات الحرارية والدهون وبنفس الوقت قاعد تقللين البروتين لنصف الكمية في الوجبة، وهذا ما يخدم هدفك.
-
🔹 اذا مع الخلطة الموصوفة فواكه، يصير اخذ النوع الي فيه فواكه؟
-
الخلطة عبارة كمية معينة من الروب اليوناني (عشان تحصل على كمية معينه من البروتين) وفوقها الاضافات... لما تختار العلبة المخلوطة مع الفواكه اساسا، بيكون محتوى الروب اليوناني اقل وبالتالي البروتين بيكون اقل ايضاً.
-
🔹 بس الروب اليوناني غالي! -
صحيح سعره غالي، لانه مستورد من برة ويشحن مبرد فتكلفتة بتكون اعلى، لكن اعمل حساب انه وضع كبديل لمصادر البروتين العالية مثل اللحوم والاسماك والدجاج وفي هذه الحالة يعتبر سعره مقبول.
-
🔹 شاخذ اذا ما كان متوفر؟ -
تاخذين الاختيارات الاخرى من النظام الموصوف، او تاخذين الروب العادي خالي الدسم (بيكون البروتين اقل مثل ما ذكرنا، لكن على الاقل ماراح تطوفين السعرات)
-
ملاحظة: القيمة الغذائية المذكورة في الصورة هي لكل ١٠٠ غرام فقط، وحجم علبة روب وزنها من ١٥٠ غرام وطالع... فاحرصوا انكم تتبعون الكمية/الوزن الموصوف، وشكراً لكم.