الجوع

الشعور في الجوع والرغبة في الأكل موضوع معقد جداً يالربع وله أسباب وعوامل عديدة... وأغلب الناس تعتقد بأن الشعور في الجوع يعني أن جسمك قاعد يقولك "ترى ما كليت كفاية ومحتاج أكل"... وممكن يكون هالكلام صحيح في بعض الحالات، لكن غالباً السبب بيكون شيء، خاصة في مجتمع يعاني من السمنة مثل مجتمعنا... -
فكروا فيها شوي... سمنة يعني قاعد آكل أكثر من إحتياجي... إذا قاعد آكل اكثر من احتياجي، ليش قاعد احس في الجوع؟ وليش من الأساس أكلت أكثر من احتياج جسمي؟ ليش جسمي ما قالي بس اكتفيت؟ لأن الموضوع وايد معقد يالربع ومازال العلم يدرس ويبحث ويكتشف فيه!
-
عموماً، عوامل عديدة تتحكم في الجوع، منها العوامل الفسيولوجية (مثل هرموناتك) ومنها عوامل نفسية (ملل، طفش، زعل، فرحان، حزين، شفت اكل عجبك... الخ) والأثنين مترابطين ويأثرون على بعض وما تقدر تفصل بينهم... يعني نفسيتك بتأثر على جسمك، وجسمك بيأثر على نفسيتك، والجوع وارد في كل الحالات.
-
طبعاً اذا اكلك مضبوط وتشرب ماي كفاية وتتمرن وتنام عدل وما عندك مشاكل صحية او نفسية او اجتماعية بيكون الشعور بالجوع قليل جداً، لكن عمره ماراح يكون معدوم... -
والحين ندخل في النقطة الي نبي نوصلها وهي:
-
الانسان يجوع وهذا شي طبيعي واذا كنت رشيق وصحتك زينة مافي مشكلة انك تاكل... لكن لما تكون تعاني من داء السمنة وقاعد تحاول تضعف، وكل مرة بتجوع فيها بتاكل عن الاسبوع كلة وترجع الى نقطة البداية... هني نقولك انك قاعد تتدلع وصج ما تبي تضعف... بتقول بس كنت جوعان وتوكم تقولون ان الشعرر بالجوع شي طبيعي! نعم طبيعي، لكن الغير طبيعي هو انك تاكل كيلو ايس كريم وتخرب تعبك ومجهودك كلة بس لانك حسيت بشوية جوع! -
اذا مو قادر تتحكم بنفسك وتبي تاكل، على الاقل اكل شي مفيد وصحي وقليل في السعرات مقارنة في الكمية.
-
مثلاً، بدل ما تاكل ٣ أكواب ايس كريم (٩٠٠ كالوري واكثر) اكل ٣ اكواب بطيخ (١٤٠-١٥٠ كالوري فقط)، الاثنين طعمهم حلو والكمية وحدة لكن شوف الفرق في السعرات!
-
تذكر بأنك دائماً تملك الخيار، وسلامتكم يالربع.