ترهل الجلد


سؤالين دائماً نواجهم، الأول "خايف جلدي يترهل لما اضعف، فشسوي عشان أتفادى هالمشكلة؟" والثاني "ضعفت وصار عندي ترهلات في الجلد، شلون أتخلص منهم؟" فقلنا لازم نكتب بوست نوضح فيه بعض الأمور المتعلقة في مثل هذه الحالات.
-
أول شي لازم نعرفه هو أن مرونة البشرة تعتمد على عدة عوامل، منها طبيعة بشرتك (جيناتك) وعمرك (تقل المرونة مع السنين) وتغذيتك (هل أكلك يوفر المغذيات الي تحتاجها البشرة وشكثر تشرب ماي) وسرعة خسارة الوزن، ولكن أهمها هو "شكثر صارلك وانت متين"... الجلد يتمدد وياخذ شكل الجسم، وإذا صارلك سنين طويلة وانت تعاني مع السمنة، طبيعي جلدك بيكون متمدد طوال هالفترة وغالباً راح يترهل عند خسارة الوزن.
-
بالنسبة للسؤال الأول، تقدر "تقلل" من ترهل الجلد إذا اتبعت الخطوات التالية (تقلل وليس بالضرورة تتجنب المشكلة تماماً)
-
1⃣ إضعف عالراحة (لا تسوي رجيم قاسي)
2⃣ خل أكلك صحي ومغذي (عشان ما يصير عندك نقص في المغذيات الي تحتاجها البشرة)
3⃣ إشرب ماء كفاية.
4⃣ تمرن وحاول انك تزيد من كتلتك العضلية.
-
وجميعها نقاط كتبنا فيها بوستات سابقاً، وتقدرون تراجعونها على موقعنا الالكتروني.
-
أما بالنسبة للاشخاص الي فقدوا وايد من وزنهم وترهلت أجسامهم (السؤال الثاني) فغالباً راح يحتاجون تدخل جراحي لإزالة الجلد الزائد.
-
نعم، تقدر تشد جسمك نسبياً عن طريق التغذية السليمة وشرب الماء الكافي والتمرين وبناء العضلات، لكن إذا صارلك سنة أو أكثر تحاول تشد الجلد بهذه الطريقة، فالأفضل إنك تستشير جراح تجميلي في الموضوع.
-
في النهاية، نعم، الجلد الزائد مظهرة مو مرغوب وممكن يؤثر على نفسيتك وثقتك بنفسك في بعض الحالات وأيضاً ممكن يسبب لك إلتهابات وطفح جلدي إذا ما حافظت على نظافة المنطقة المترهلة بإستمرار، لكن كل هذا لا يقارن بمخاطر السمنة على صحتك.
-
الخلاصة: سو الي عليك وإضعف بالطريقة الصحيحة عشان تقلل من فرصة حدوث الترهلات قدر الامكان، وإذا ضعفت وظلت الترهلات معك فترة طويلة، استشير الطبيب المختص في الموضوع.
-
شاركونا تجاربكم مع خسارة الوزن ومع ترهل الجلد وشلون تعاملتوا معها في الكومنت تحت 👇🏻👇🏻👇🏻 لحد يستحي، فيد واستفيد من تجارب غيرك.