التغذية "بعد" عملية التكميم

لازم تتبع الخطة الغذائية الموصوفة من قبل أخصائي التغذية عشان تتشافى من العملية أسرع وعشان تقلل من الآثار الجانبية للعملية قدر الإمكان.
-
أول يومين في المستشفى بيكون غذائك عبارة عن سوائل فقط (شوربة، ماء، عصير) وبكميات صغيرة جداً (حوالي ٣٠ ملل فقط) وخلال الفترة من الإسبوع الثاني وطالع، غذائك بيصير أثقل (من ناحية القوام) بالتدريج لغاية ما تصير تقدر تاكل الغذاء العادي (غالباً بعد ٦ الى ٨ أسابيع حسب الحالة) والوجبات بتظل صغيرة (بوزن ٩٠-١٠٠ غرام للوجبة) بسبب صغر حجم المعدة.
-
بعد ما تخلص من هالفترة الانتقالية (ونصيحة اتبع تعليمات الطبيب واخصائي التغذية بحذافيرها) عليك بالنصائح التالية:
-
1⃣ أعتمد على الطعام الطبيعي أكثر شي وابتعد عن الاغذية المصنعة قدر الامكان.
2⃣ عليك بالاغذية العالية بالبروتين قبل أي شي (عشان تحافظ على كتلتك العضلية قدر الامكان وعشان تتجنب مشاكل تساقط الشعر وترهل الجلد ونقص المناعة قدر الامكان)
3⃣ إذا مو قادر تاكل بروتين كفاية، إشرب بروتين (اغلب المتكممين راح يحتاجون مكملات البروتين للتعويض)
4⃣ التزم بمكملات المعادن والفيتامينات الموصوفة من قبل الطبيب او اخصائي التغذية (اكلك قليل، لازم تعوض)
5⃣ إبتعد عن الحلويات والسكريات قدر الامكان (عشان سكر الدم يكون مضبوط وما تجوع اكثر ونفسيتك ما تعتفس)
6⃣ إشرب ماي وايد طوال اليوم (لترين وفوق) بس بعيد عن وقت الاكل (خل شرب الماء ٣٠ دقيقة بعيد عن وقت الاكل عشان ما تترس بطنك وتتعب)
7⃣ إلتزم في خطة عذائية ولا تخلي أكلك عشوائي (تذكر ان كمية اكلك قليلة، فلازم تكون موزونه بطريقة صحية لتجنب المشاكل والمضاعفات) -
خلاصة الموضوع: قرارك انك تسوي عملية التكميم مو عبارة عن قص معدة وخلاص تروح بعدها تاكل الي تبيه بكميات صغيرة، لاء، لازم تكون قد هالقرار وتطبق التعليمات صح، ولا تضيع وقتك وتقعد تجرب على نفسك، راجع أخصائي تغذية باستمرار لغاية ما تعرف كل الي لك وعليك.
-
منشن ربعك المتكممين لتعم الفائدة، وشكراً.