التكميم

عملية التكميم بكل إختصار عبارة عن إزالة جزء كبير من المعدة بهدف تقليل كمية الأكل وخسارة والوزن والتخلص من الأمراض المصاحبة للسمنة مثل السكري وارتفاع ضغط الدم وغيرة... وهذا كلة كلام عارفينة ويمكن مافي أحد ما مر عليه على الأقل واحد مسوي تكميم... المهم، بنتكلم عن الأمور الي لازم تراعيها قبل لا تفكر تسوي تكميم.
-
أول شي، شنو شروط العملية؟
-
عشان تحصل على موافقة الدكتور، لازم يكون مؤشر كتلة الجسم ٣٥ وفوق ويكون المريض مو قادر يتحكم في مشاكلة الصحية (سكر، ضغط، كلسترول، الخ)، وهني يشوف الطبيب بأن اجراء عملية التكميم بيكون في صالح صحة المريض (الترجمة: إذا كنت تعاني من السمنة و صحتك تعبانة والطبيب شاف ان مالك حل غير التكميم، بيسويلك العملية)
-
هل العملية فعالة؟
-
نعم، غالباً يخسر المتكمم لغاية ٧٠٪‏ من وزنة الزائد خلال سنة من إجراء العملية، والامراض المزمنة المتعلقة بالسمنة غالباً تخف بشكل كبير أو حتى تختفي.
-
شنو الي لازم يتغير بعد العملية؟
-
طبعاً لانك ما تقدر تاكل الا كميات قليلة، لازم تاكل وجبات صغيرة وعديدة وصحية خلال اليوم وتركز بشكل اساسي على الاغذية العالية بالبروتين والاغذية الطبيعية وتبتعد عن الاغذية المصنعة، وتشرب ماء بكمية لا تقل عن ٢ لتر في اليوم (بين الوجبات وليس مع الوجبات) وتلتزم بالفيتامينات والمعادن الموصوفة من قبل الطبيب او اخصائي التغذية، وعلى الاقل مارس الرياضة ٣-٤ مرات في الاسبوع (هوائية ومقاومة) -
شنو المضاعفات والآثار الجانبية للعملية؟
-
نسبة نجاح العملية عالية جداً (ونسبة عدم النجاة من العملية لا تتعدى 0.3%)، لكن في بعض المضاعفات او الاثار الجانبية (الغير خطيرة) مثل الشعور بالغثيان والارتجاع المريئي المعدي وسوء/عسر الهضم ونقص في فيتامينات ومعادن الجسم (اذا ما تاخذ مكملات) وزيادة فرصة حدوث حصوات المرارة وترهل الجلد وممكن ترجع تمتن اذا ما اهتميت باكلك وصحتك.
-
شنو الخلاصة؟
-
إذا صحة المريض تعبانة بسبب السمنة وحاول لفترة طويلة انه يضعف مع الحمية والرياضة وما قدر، مافي مانع انه يسوي تكميم اذا كان هالشي بيغير صحتة وحياته للأفضل... يعني اذا بعد التكميم بتصير تمارس الرياضة وتهتم باكلك وصحتك بيكون قرارك سليم، أما إذا بستمر بالغذاء السيء والربادة (قلة الحركة) وعدم الالتزام بالممكملات الغذائية وشرب الكفاية من الماء وكل شوي تطيح غشيان، طبيعي الكل بيشوف أن قرارك كان سيء.
-
كتبوا تجاربكم وآرائكم مع التكميم في الكومنت تحت 👇🏻👇🏻👇🏻