شنو أحسن رجيم؟


يمكن وايد ناس تعتقد بأن خسارة الوزن عملية معقدة ومحتاجة "خلطة" سرية عشان تنجح... والسبب الرئيسي لهذا الاعتقاد هو التشويش المستمر من قبل "المختصين" في هذا المجال... نشرح الموضوع زيادة شوي...
-
العديد من الرجيمات المشهورة مثل "باليو وكيميائي واتكنز وكيتوني ورجيم قليل الكربوهيدات ورجيم قليل الدهون...الخ" يسوقون النظام بطريقة تخليك تعتقد بأن بعض الأغذية أو المجموعات الغذائية هي سبب سمنتك ولازم تلغيها تماماً... وهذا كلام ماله أي أساس ولا دليل علمي (قاعد نتكلم عن الاغذية الطبيعية، مثل الي يقولك اقطع القمح او اقطع الالبان... الخ) -
إي نعم جميع الانظمة الغذائية المشهورة تنزل الوزن، ولكن السبب ليس بالخلطة السرية للنظام، بل هو وبكل بساطة بسبب "تقليل السعرات الحرارية" فقط.
-
لو تبحث وتدرس كل نظام منهم وتقارنه مع غيرة من الانظمة، راح تشوف بأن السبب الوحيد الي خلاك تضعف هو تقليل كمية الطعام، سواء كان عن طريق تقليل جميع اصناف الطعام او الغاء مجموعات معينه... النتيجة واحدة وهي انك قاعد تاكل كمية سعرات حرارية أقل وبالتالي راح تخسر من وزنك.
-
لا تعقد الموضوع لانه بسيط... الجسم في كل الحالات بيستقبل الطعام على انه بروتين وكربوهيدرات ودهون والياف وفيتامينات ومعادن وماء... مهما كان مصدر الطعام، في نهاية عملية الهضم هذا الي راح يبقى...
-
ملاحظة: قاعد نتكلم عن انواع الحمية المختلفة وعلاقتها في خسارة الوزن فقط (يعني مو قاعد نقيمها حسب فوائدها أو أضرارها للصحة... هذا موضوع ثاني) -
خلاصة الموضوع:
-
إذا أحد قالك انك محتاج تقطع صنف معين من الطعام عشان تضعف (صنف طبيعي مثل الفواكه والقمح والالبان او اللحوم... الخ) قولة إستريح لأن خسارة الوزن بكل بساطة عبارة عن انك تحرق طاقة أكثر من الي تاكلها، وشكراً.