إخسر وزنك... بعدين فكر بالتثبيت


في أسئلة غريبة توصلنا على الدايركت والواتساب وكلها عن موضوع تثبيت الوزن، والغريب في الموضوع هو أن الشخص الي قاعد يسأل يعاني من السمنة المفرطة... يعني قاعد تحاتي شلون تثبت وزنك قبل لا تبلش تخسر وزنك!!!! وهذا موضوعنا اليوم يالربع.
-
أول شيء، لازم تعرف بأن السمنة المفرطة تزيد من خطورة الإصابة بالأمراض المزمنة مثل الضغط والسكر وامراض القلب والشرايين ومشاكل المفاصل والتنفس وغيرة (وهذا كله عارفينه من زمان)، لكن قاعد نحاول نقول انك لازم تهتم بصحتك وتحاتيها أكثر من أي شي ثاني... -
ثانياً، إنت حالياً قاعد تحاتي شلون تثبت وزنك بعد سنة من الحمية، وأحنا قاعد نحاتي قدرتك على الإلتزام لأول إسبوعين... لازم ترتب أهدافك وتقدم على الخطوة الأولى قبل لا تفكر بأي شيء ثاني... لا تسبق الأحداث...
-
ثالث نقطة، منو قالك أن تثبيت الوزن صعب؟؟ التثبيت وايد أسهل من خسارة الوزن، وكتبنا عن هالموضوع من قبل... لكن بنلخص لك الموضوع بالصورة الي فوق.
-
الصورة تمثل الأمور الأساسية الي بتساعدك على تثبيت الوزن، وهي:
-
1⃣ التغذية السليمة.
2⃣ ممارسة الرياضة.
3⃣ متابعة وزنك ومقاساتك بشكل مستمر (عشان لا تنسى نفسك)
-
إي نعم، الموضوع بهده البساطة... ليش التعقيد؟ فكر فيها شوية... إنت عشان تخسر وزنك، راح تتبع عادات غذائية وصحية وتستمر فيها، وخلال هذه الرحلة، راح تتعلم شلون تتابع أكلك وراح تفهم جسمك أكثر، وأكيد بتصير عندك خبرة في الرياضة (طبعاً قاعد نتكلم عن الاشخاص الي خسروا وزنهم بالطريقة الصح، مو عن طريق انظمة قاسية وادوية وجراحة وغيرة بدون لا يتعلمون أي شي) -
أي شخص يتعب على نفسة ويتغير، ماراح يحاتي موضوع التثبيت اطلاقاً، لأن راح تصير ثقافتة الصحية جداً عالية... -
وحط في بالك، اذا ناوي تسوي رجيم وتضعف وبعدها ترجع لعاداتك القديمة السيئة، راح ترد وزنك الي فقدتة وترجع نفس أول ويمكن أسوء... خسارة الوزن والمحافظة عليه تحتاج تغيير مستمر في نمط حياتك، وسلامتكم من أي شر. -
شاركونا تجاربكم مع خسارة الوزن تحت 👇🏻👇🏻👇🏻