نظام المرونة والمفاهيم الخاطئة

يعتقد الكثيرين بأن نظام المرونة في التغذية هو نظام غير صحي والبعض يعتقد ان المرونة تعني "إكل كل شي وأي شي دامك ملتزم بالسعرات" وهذا كلام غير صحيح إطلاقاً.
-
نظام المرونة يعني إنك تاكل إحتياجك من السعرات والمغذيات الكبرى والصغرى والألياف، يعني مستحيل تقدر تاكل خرابيط طوال اليوم، لانك ماراح تقدر تغطي احتياجك بهل طريقة.
-
على سبيل المثال، اذا اكلت وجبة دسمة، راح تستهلك جزء كبير من احتياجك اليومي للدهون والسعرات الحرارية وبالتالي راح تضطر تاكل أكلات قليلة في الدهون والسعرات لباقي اليوم، ولا تنسى انك لازم تغطي احتياجك من الفيتامينات والمعادن والالياف بعد، وعشان يتحقق هالشي، لازم تاكل وتنوع في الخضروات والفواكة والحبوب الكاملة... يعني الموضوع مو بس تحسب جرامات بروتين وكربوهيدرات ودهون وخلاص... لازم كل شي يكون متوازن ومعتدل.
-
وموضوع ثاني، لايكون عبالك ان الي يتبع نظام غذائي يعتمد على "الاكل النظيف" فقط بيكون وضعة ونظامة صحي اكثر من المرونة؟ كلش لاء، العكس تماماً هو الصحيح.
-
إلغاء مجموعات غذائية كاملة او اصناف معينة من الاكل الطبيعي مستحيل ان يكون عادة صحية سليمة... وين الصحة في الموضوع؟ اكلك كله ممنوعات ونفسيتك تعبانة وحياتك صعبة!!! -
فكر فيها شوي، شنو الضرر انك تاكل احتياجك من السعرات الحرارية والبروتين والكربوهيدرات والدهون والالياف والفيتامينات والمعادن وبنفس الوقت اخذت لك وجبة ولا سناك من الخرابيط الي تحبها بكمية معتدلة؟ مافي أي ضرر، بالعكس شكلك بيتحسن وصحتك البدنية بتتحسن وكذلك صحتك النفسية.
-
المشكلة هي ان العديد (شامل المختصين والمدربين) فاهمين التغذية غلط، عبالهم ان الموضوع ابيض او اسود، صح او خطأ، ممنوع او مسموح وبس! وبصراحة، هالفكر لازم ينقرض لانه غير صحيح إطلاقاً. -
الخلاصة: نظام المرونة نظام صحي جداً ويحتاج فن يالربع... لازم تعرف شلون توازن بين احتياجك من الغذاء وبين ذوقك في الأكل... وسلامتكم.
-
جمعة مباركة يالربع.