حرق الدهون في أماكن معينة في الجسم


مافي أحد ما وده يخسر دهون من أماكن معينه ومحددة (البطن، الخصر، الارداف... الخ)... لكن هل من الممكن إنك تحدد أماكن حرق الدهون؟؟؟
-
الجواب وبكل إختصار هو لاء، ما تقدر تحدد موقع حرق الدهون في جسمك... ليش؟ -
وايد عبالهم بأن عند تمرين عضلة معينة، الجسم راح يستخدم الدهون المحيطة في هذه المنطقة، لكن في الواقع، الدهون تخزن في الخلايا الدهنية على صورة الدهون الثلاثية والجسم ما يقدر يستخدم هالنوع من الدهون بشكل مباشر... لازم تتحول هذه الدهون الثلاثية الى غليسرول واحماض دهنيه حرة، وبعدها تدخل مجرى الدم وتتأكسد لإنتاج الطاقة... معنى هذا الكلام ان الجسم يقدر يستخدم الدهون المخزونة كمصدر للطاقة من أي مكان في الجسم (وليس بالضرورة من الاماكن القريبة او الاماكن الي تبيها)
-
يعني قاعد تقولي لو أتمرن معدة كل يوم ماراح أحرق الدهون في بطني؟
-
لو شنو تسوي، إذا مو قاعد تحرق سعرات أكثر من السعرات الي تاكلها، ماراح تضعف، وحتى لو تحرق سعرات اكثر من اكلك، الجسم بياخذ الدهون من أي مكان في جسمك ومو بالضرورة من منطقة البطن... ودام الموضوع كله يعتمد على كمية الحرق، يعني تمارين المعدة مو وايد فعالة في حرق الدهون كثر التمارين الاخرى... يعني لو تركض بتحرق دهون اكثر من تمارين المعدة... -
نلخص الموضوع:
-
التمرين للعضلات والضعف والمتن يعتمد على السعرات (شكثر تاكل وشكثر تحرق) وبطل سالفة انك تمرن مناطق معينه وتهمل مناطق اخرى، لان مو بهذه الطريقة يشكلون الجسم... وسلامتكم يالربع.
-
ملاحظة: الكلام الي فوق مثبت علمياً وعليه دراسات كثيرة من بداية السبعينات الى يومنا هذا.