ودي أضعف... ولكن

مافي أحد يعاني من زيادة في الوزن وما ودة يضعف، ومافي أحد ما يتمنى ان يطور من نفسة (في جميع جوانب الحياة مو بس الصحة وشكل الجسم)... وهذا شيء جداً طبيعي.
-
لكن الغير طبيعي هو إنك تتمنى أن تطور من نفسك وبنفس الوقت ما عندك أي إستعداد لبذل المجهود المطلوب والسعي تجاه أهدافك... -
بشكل مستمر نشوف الأمثلة التالية:
-
🔹 شخص يعاني من السمنة، ويبي يضعف، لكن ما عنده استعداد يغير أكلة، ولا يبي يمارس الرياضة!
🔹 لاعب كرة قدم (أو أي رياضة أخرى) يبي يطور من مستواه ويصير لاعب أفضل، لكن ما عنده استعداد يبطل السهر والشيشة والوجبات السريعة وتلاقيه يروح التمرين غصب!
🔹 شخص يعاني من قلة الوزن والهزالة، ويبي يزيد وزنه الى المعدل الطبيعي، لكن بنفس الوقت ما يبي ياكل ولا يتمرن!
🔹 مصاب بمرض السكري والضغط وفيه فقر دم واملاح زايدة، والطبيب تعب واهو يزيد له جرعة الادوية، وماكو فايدة لانه يرفض يتبع نظام غذائي ويمارس الرياضة!
-
وغيرة وايد أمثلة في جميع جوانب الحياة... لكن ثق تماماً بأن محد يقدر يساعدك إذا إنت ما تبي تساعد نفسك... وتأكد بأنك ماراح تحقق أهدافك إلا بالإجتهاد والإنضباط والإستمرارية فيهم... وحط في بالك زين بأنك أيضاً محتاج تتعلم الصبر والمثابرة وعدم اليأس... فشلت؟ حاول بعد، فشلت ١٠٠ مرة؟ حاول ١٠٠٠ مرة... لا تتذمر وتلوم الظروف... حدد أهدافك وإسعى وراها وإستمر في سعيك دام هالشي تبيه.
-
مافي شيء تحصلة بدون مجهود له قيمة... وبنفس الوقت قيمة الشيء تكمن في المثابرة والظروف الصعبة الي مريت فيها. -
الخلاصة: خلك #صملة ولا تصير #قوطي