Detox Diets أنظمة الديتوكس

أنظمة الديتوكس الغذائية

السوق متروس منتجات خاصة للديتوكس، حبوب، شاي، عصائر، وفي انظمة غذائية كاملة لهذا الغرض

هل هذه المنتجات والأنظمة فعلاً فعالة في طرد السموم من الجسم؟

لو افترضنا ان الجواب نعم، شنو هالسموم الي قاعد يتكلمون عنها؟ لما واحد يقولك سو نظام الديتوكس عشان تنظف جسمك، بالضبط تنظف جسمك من شنو؟ 
أنظمة الديتوكس كلها عبارة عن كلام فاضي... لكن أكيد مر عليك واحد او وحده يحلف ان صحته تحسنت من نظام الديتوكس وقام يحس بانه صار صحي أكثر. شلون صار هالشي؟؟؟

عادة لما واحد يكون مقضي حياتة واهوه ياكل وجبات سريعة وحلويات واغذية مصنعه، بيحس ان صحته تحسنت اكيد لما يبدأ يخلط خضروات وفواكهه ويشربهم، هذا شي طبيعي، لان الخضروات والفواكة متروسة فيتامينات ومعادن وماء، وهم طبيعي ان وزنه ينزل لما يكون عايش على عصائر الديتوكس اسبوع ولا اسبوعين كاملين، ونزول الوزن هني عادة يكون من السوائل والعضلات، لأن هالشخص قاعد يشرب ماي أكثر ويستهلك طاقة وايد قليلة

طرد السموم من الجسم هو وظيفة الكبد والكلى، واذا حاب تريح جسمك من كثرة الاكل (خاصة الاكل المصنع والفاست فود)، كل الي عليك تسويه هو انك تاكل باعتدال، تنام عدل، تمارس الرياضة، وتشرب ماي كفاية

الخلاصة: الديتوكس كلام فاضي