Lateral Dumbbell Raises

نسميه بالكويتي "رفرفة أكتاف جانبي" وتقدر تسوية بالدامبلز أو الكيبل أو سيور المقاومة، ويستخدم لتمرين عضلات الكتف الوسطى (الجانبية)... واليوم بنتكلم شوية عن هالتمرين.
-
أول شي لازم نعرفه هو ان هالتمرين مو تمرين أوزان عالية، يعني سالفة انك تشيل وزن مبالغ فيه ماراح تفيدك ولا راح تعطيك النتيجة الي تبيها وغالباً بتسبب لك إصابة، والأفضل انك تستخدم وزن تقدر تتحكم فيه وتشيلة لعدات/تكرارات عالية (١٠ الى ٢٥ عدة/تكرار) للحصول على أفضل نتيجة.
-
ثاني نقطة مهمة هي إنك ترفع الوزن لغاية ماتصير ذراعك أفقية (مثل الصورة) لأن رفع الوزن أعلى من المستوى الأفقي بيشغل عندك عضلات المثلثات العلوية والوسطى أكثر، وإنت تبي تمرن عضلات الكتف الجانبية. -
ثالث نقطة، تقدر تطبق التمرين بثلاث وضعيات بداية مختلفة 1⃣ الوزن بجانب جسمك 2⃣ الوزن خلف جسمك 3⃣ الوزن أمام جسمك... فإختار الوضعية الي تحس فيها أكثر شي (تذكر بأن هيكل الجسم يختلف من شخص لآخر)
-
رابع نقطة، تقدر تزيد من شدة التمرين عن طريق الثبات أعلى الحركة (الوضع الافقي لليد) لبضع ثوان. -
الخلاصة:
-
تمرين الرفرفة الجانبي للأكتاف تمرين ممتاز ويعطي شكل جميل لعضلات الكتف، وعشان تستفيد منه أكثر:
1⃣ لا تشيل وزن ثقيل، وتمرن بتكرار عالي.
2⃣ ارفع الوزن لغاية ما تصير ذراعك أفقية.
3⃣ اختار وضعية البداية المناسبة لهيكل جسمك.
4⃣ إثبت ٢-٣ ثوان في أعلى الحركة لزيادة شدة التمرين.
-
منو فيكم يحب/يكرة هالتمرين؟ شاركونا تجاربكم في الكومنت تحت 👇🏻👇🏻👇🏻