ليش أوزاني مو قاعد تزيد نفس أول أسابيع؟

لما تبدء تتمرن بالأوزان بتلاحظ ان أوزانك في التمرين قاعد تزيد بمعدل سريع نسبياً، لكن مع الوقت بتلاحظ انك مو قادر تزيد أوزانك في التمرين بنفس معدل السرعة، والزيادة كل مالها وتصير أصعب مع الوقت... وهذا شيء ممكن يخلي اللاعب يمل او يفقد اهتمامه بالتمرين لانه مو قاعد يشوف تطور ملحوظ في الأداء.
-
مثال توضيحي: ممكن شخص اول ما بلش يتمرن كان يشيل دامبلز بوزن ٥ كغ، وخلال شهر وصل الى ١٠ كغ (يعني ضاعف الوزن)، وبعد شهر قدر يوصل الى ١٥ كغ (يعني زاد قوتة ٥٠٪‏) وبعد شهر صار يقدر يشيل ٢٠ كغ (يعني زاد ٢٥٪‏) والموضوع كل مالة وقاعد يصير اصعب... شنو السبب؟ -
تحكم الجهاز العصبي في العضلات له تأثير مباشر على القوة القصوى للعضلة عن طريق تحديد نوع وعدد الوحدات الحركية في العضلة المنقبضة... والزيادة السريعة والملحوظة في القوة سببها تكيف الجهاز العصبي مع التمرين... يعني تقدر تقول بأن العقل قاعد يتعلم شلون يقدر يطلع قوة اكثر من النسيج العضلي المنقبض خلال الفترة الاولى.
-
يعني بالعربي، اول ما تبلش تتمرن بالاوزان، جهازك العصبي بيتعلم شلون يقدر يخلي العضلة تشيل اكثر عن طريق زيادة عدد الوحدات الحركية في العضلة وبالتالي بتقدر تشيل وزن اكثر.
-
بعد ما يتكيف جهازك العصبي مع التمرين، بيصير العامل الاكثر تأثيراً في زيادة الاوزان هو "حجم" الوحدات الحركية في العضلة (يعني حجم العضلة)
-
وأعتقد ان اي لاعب مستواه متقدم في التمرين يدري شكثر صعب انك تكبر حجم العضلة... وللمبتدئين عشان لا يحوشكم احباط، لازم تستوعب بأنك راح تستمر في التطور اذا كنت قاعد تتمرن وتاكل وترتاح عدل، لكن اكيد الزيادة بتكون بمعدل أبطىء من قبل.