هل مشروبات الدايت الغازية تزيد الوزن؟

وين ما تروح أو تقرأ راح تلاقي أحد يقول بأن مشروبات الدايت الغازية (الخالية من السعرات) تسبب زيادة في الوزن، وجميعهم مقتبسين هالمعلومة من نفس المصادر والدراسات الضعيفة
-
أول شي لازم نفهم بأن زيادة الوزن سببها الرئيسي هو الإفراط في الأكل، يعني اذا اكلت فوق احتياجك، ما يفرق اذا كان اكلك صحي أو غير صحي، راح يزيد وزنك
-
زين، خل نشوف موضوع الدراسات على مشروبات الدايت الغازية شتقول؟
-
ابحث في جميع المصادر راح تلاقي ثلاث أنواع من الدراسات بهل موضوع
-
النوع الأول كله دراسات عبارة عن ملاحظات لا أكثر، يعني راقبوا ناس لفترة زمنية معينة، ولاحظوا بان الي يشربون هالمشروبات عادة يكون عندهم زيادة في الوزن
-
النوع الثاني من الدراسات استنتج واقترح بان المحليات الصناعية تخلينا نتعود بأن الطعم الحلو غير مرتبط بالسعرات الحرارية، فلما ناكل شي في سكر، ماراح نقدر نوقف! وهذا فقط استنتاج أو اقتراح، ولا يعتبر دليل علمي
-
النوع الثالث، دراسات صغيرة جداً تمت على الجرذان! واستنتجوا منها بأن المحليات الصناعية تزيد الوزن! وكل هالدراسات كانت جداً ضعيفه وما اثبتت أي شي
-
الحين خل نفكر مع بعض شوية، ليش يقولون هالمشروبات تزيد من الوزن بسبب المحليات الصناعية "الخالية من السعرات" واهيا اساساً "خالية من السعرات"؟
-
ليش المحليات الي بهل مشروبات مو زينة؟ وبنفس الوقت ينصح باستخدامها مع الشاي والقهوه والسناكات الصحيه وغيرة؟ مو كلهم نفس المواد
-
وبالنسبة للملاحظة بان الناس الي تشرب دايت عادة يعانون من السمنة، يعني تكفة جم واحد تعرفونه يطلب سندويشتين وشبس من مطاعم سريعة بس يشرب معاهم دايت؟ عموم الي يعانون من زيادة الوزن جذي، وسبب زيادة الوزن هني جدا واضح بانه ليس من مشروب الدايت اطلاقاً، مشروبات الدايت هني عبارة عن ترقيعة للمصايب الي سووها
-
لكن الحقيقة هي ان استبدال السكر بالمحليات الخالية من السكر يعتبر تكتيك ذكي للتقليل من استهلاك الطاقة وبالتالي المساعدة على نزول الوزن اذا كنت من مدمنين الحلويات والسكريات، دامك قاعد تستهلك طاقة اقل من احتياجك، راح ينزل وزنك
-
الخلاصة: لا توجد أدلة علمية تثبت بأن مشروبات الدايت الغازية تسبب زيادة في الوزن
-
تنبيه: انا مو قاعد أقول شربوا هالمشروبات طول اليوم، ولا قاعد اقول بانهم يعتبرون مشروبات طبيعية وصحية، ولا قاعد اصرح بانها خالية من الأضرار، انا فقط قاعد اوضح لكم بان استهلاك هذه المشروبات ماله علاقة في زيادة الوزن، وشكراً